तीनजना मात्र कृषि प्राविधिक भरमा स्थानीय तह

चौतारा सागाचोकगढी नगरपालिका–७ सिरुबारीका कृषक दुर्गाप्रसाद श्रेष्ठले लगाएको तरकारी बारीमा रोग लाग्दा के उपचार गर्ने भन्ने सल्लाह लिन कृषि प्राविधिक पाउनु भएन । समयमा नै प्राविधिक सल्लाह नपाउदा उहाँले लगाएको काउली तरकारी रोगले डढ्याे ।

‘समयमा नै प्राविधिक सल्लाह लिएर उपचार गर्न पाएको भए तरकारीमा लागेको रोग निको हुन्थ्यो होला । तर, प्राविधिक नपाउँदा यस वर्षको मेहनत त्यसै खेर गयो’ श्रेष्ठले भन्नुभयो । सोहि नगरपालिका–७ नेपानेका दुर्गाप्रसाद नेपालको पनि गुनासो त्यस्तै छ । ‘खै अब त गाउँगाउँमा सिंहदरवार आयो भन्छन् । तर हामीले तरकारी बालिमा रोगलाग्दा कृषि प्राविधिक पाएनौं’ उहाँले भन्नुभयो ‘माटो अनुसारको बालि लगाउन पराशर्मको लागि होस् वा बालिमा किरा लाग्दा प्राविधिकको सल्लाह लिन होस् समस्या नै छ ।’

जिल्लाकै सबैभन्दा ठूलो नगरपालिका चौतारा सागाचोकगढी नगरपालिकामा १४ ओटा वडाहरु छन् तर । तीनजना मात्र कृषि प्राविधिकहरू रहेको छन् । उहाँहरू मध्यपनि एकजनाले नगरपालिकाको कृषि शाखामा बस्नु पर्ने भएकाले दुईजना प्राविधिक कृषकहरूको खेतवारीमा पुग्न त परैजाओस सल्लाह लिन कार्यालयमा आएका कृषकहरूलाई सल्लाह दिन समेत नभ्याएको नगरपालिका मेयर अमानसिं तामाङले बताउनुभयो । “कृषकहरूको माग र भनाई जाहेज हो, दरबन्दी अनुसारको कर्मचारी नहुँदा समस्या छ” मेयर तामाङले भन्नुभयो ।

चौतारा सागाचोकगढी नगरपालिकामा मात्र हैन जिल्लामा अन्नको भण्डार भनेर चिनिने मेलम्ची नगरपालिकामा समेत कृषि प्राविधिकहरूको समस्या रहेको मेयर डम्बर अर्यालले बताउँनुभयो । “कृषकहरूलाई प्राविधिक सेवा दिन सकिएको छैन्” मेयर अर्यालले भन्नुभयो “कृषि प्राविधिकलाई गाउँमा पठाउनै गाह्रो छ,पठाएकालाई टिकाउनै गाह्रो ।”

कृषकको बालिमा रोग लाग्दा र कृषि प्राविधिकको सल्लाह नपाउँदा उत्पादनमा कमी भएको जिल्ला समन्वय समितिका उपप्रमुख बालकुमारी सापकोटाले बताउनुभयो ।

Comments

comments