माथिल्लो त्रिशूली थ्रि ‘ए’ जलविद्युत् उद्घाटन हुँदै

Uper trishuli 3A (5)

रसुवा, रसुवा र नुवाकाेट र रसुवाकाे सीमानामा ६० मेगावाट क्षमताको माथिल्लो त्रिशूली थ्रि ‘ए’ जलविद्युत् आयोजनाकाे मंसीर २ गते उद्घाटन हुँदैछ । अब व्यवसायिक उत्पादन सुरू हुन लागेकाे हाे ।

आयोजनाले पाँच महिना अघिदेखि नै उत्पादन सुरु गरेको थियो। आयोजनाको केही काम बाँकी रहेपछि आयोजना व्यावसायिक उत्पादनमा गएको थिएन। सोमबार टेकिङ ओभर सर्टिफिकेट दिने र सोही दिनदेखि व्यावसायिक उत्पादनमा जाने आयोजना प्रमुख फडिन्द्रराज जोशीले बताए। ‘आयोजनाको सम्पूर्ण परीक्षण तथा निरीक्षणको काम सकिएको छ,’ उनले भने।

रसुवामा बाँध र नुवाकोेटमा विद्युत्गृह रहेको आयोजना नेपाल विद्युत् प्राधिकरणले निर्माण गरेको हो। ६० मेगावाट क्षमताको आयोजनाको पहिलो युनिटबाट उत्पादित ३० मेगावाट विद्युत् गत जेठ ३ गते र दोस्रो युनिटबाट उत्पादित ३० मेगावाट विद्युत् साउन १७ गते राष्ट्रिय प्रसारण प्रणालीमा जोडिएको थियो। व्यावसायिक उत्पादन सुरु भएपछि एक वर्षसम्म त्रुटि सच्याउने अवधि हुन्छ।

आयोजनाको मुख्य सुरुङको ब्रेक थ्रु २०७४ भदौमा भएको थियो। आयोजनाको निर्माण ठेकेदार चाइना गेजुवा ग्रुप अफ कम्पनी (सिजिजिसी)ले गरेको हो। इन्जिनियरिङ, खरिद र निर्माण (इपिसी) मोडलमा सिभिल विद्युत् गृह, बाँध, सुरुङलगायत संरचना र इलेक्ट्रोमेकानिकल तथा हाइड्रोमेकानिकलको काम गर्न सिजिजिसीसँग २०६७ जेठ १४ गते ठेक्का सम्झौता भएको थियो।

आयोजना २०६८ साल वैशाखबाट निर्माण सुरु भएको थियो। भूकम्पका कारण करिब २२ महिना निर्माण कार्य प्रभावित बनेको थियो। भूकम्प र नाकाबन्दीले आयोजनाको संरचनामा क्षति पु¥याएको थियो। आयोजना निर्माण सम्पन्न गर्नका लागि १३ अर्ब ९९ करोड १२ लाख ५० हजार रुपयाँ खर्च हुने छ।

Comments

comments