माधव गुरुङको हात प¥यो तेस्रो किस्ता रकम

transparency International Nepal

जयराम आचार्य

रसुवा जिल्ला उत्तरगया गाउँपालिका वडा नम्बर ३ ठूलोगाउँ स्थायी निवासी माधव गुरुङ चिन्तित थिए । उनको चिन्ताको कारण थियो– आफूले वर्षैदेखि बस्दै आएको घर वि.सं. २०७२ बैशाख १२ गतेको विनाशकारी भूकम्पका कारण पूर्ण क्षति हुनु ।माधव गुरुङ चिठी

६ जनाको परिवार व्यवस्थापन गर्न माधव गुरुङलाई ज्यादै मुश्किल थियो । प्रारम्भिक समयमा उनले स्थानीय सामग्रीबाट सामान्य निर्वाह हुने टहरो-गोठ बनाए । सरकारले भुकम्पपिडीतलाई आवास निर्माण गर्न सहयोग गर्ने कुरा रेडियोमार्फत सुनेका माधव गुरुङले केही राहतको सास फेरेका थिए । उनको दुःख भुलाउने साथी त्यही रेडियो नै थियो । नभन्दै सरकारले भूकम्बाट पिडीत नागरिकका लागि आवास निर्माण गर्न पहिलो किस्ता स्वरुप ५० हजार रुपैयाँ दियो ।

सरकारले पहिलो किस्ता स्वरुप ५० हजार रुपैयाँ दिएपछि उनले आफ्नो घर बनाउने योजना बनाए । उनसँग सामान्य काठ र सिमेन्टको काम गर्ने सीप पनि थियो । साथै काममा सहयोग गर्ने श्रीमति पनि । उनीहरुले दुःख सुख गर्दै छिमेकीसँग अर्मपर्म गर्दै डिपिसी लेबलसम्म काम गरे । डिपिसी लेबल पुरा गरेपछि दोस्रो किस्ता पाउने रेडियोमार्फत सुनेका माधव गुरुङ प्रक्रिया बुझ्न नजिकैको वडा कार्यालयमा गए । उनले वडा कार्यालयमा रहेका सम्बन्धित प्राविधिकका भनाई बमोजिम नै कागजपत्र बुझाए । दोस्रो किस्ता पनि उनको सेयर भर्न खोलेको बैंक खातामा आयो । उनी थप उत्साही हुँदै घर बनाउन लागे ।

उनले लोडबेरिङवाला दुई कोठे घर र शौचालय निर्माण सम्पन्न गरेपछि पुनः वडा कार्यालयमा तेस्रो किस्ताका लागि कागजपत्र बुझाए । कागजपत्र बुझाएको ३ महिना बित्दा पनि तेस्रो किस्ता नआएपछि उनी समस्यामा पर्न थाले । उनले आफ्नै वडा कार्यालयमा गर्ई सम्बन्धित प्राविधिक कर्मचारीलाई पनि समस्याबारे अवगत गराएका थिए तर उनीहरुले उपयुक्त सहजीकरण नगरिदिँदा उनी थप समस्यामा परेका थिए । एक दिन मध्यान्नमा रेडियो रसुवाबाट भूकम्पपछिको सदाचारमूलक सन्देश कार्यक्रम सुनिरहेका माधव गुरुङले कुनै समस्या भए ट्रान्सपरेन्सी इन्टरनेशनल नेपाल रसुवामा सम्पर्क गर्न सकिने सूचना सुने । सूचनामा दिइएको सम्पर्क नम्बरमा उनले फोन गरे । फोन कार्यालयका संयोजनले उठाए र समस्या सुने ।

समस्या सुनेपछि ट्रान्सपरेन्सी इन्टरनेशनल नेपाल रसुवाका संयोजक जिल्ला आयोजना कार्यान्वयन इकाई (भवन) र स्थानीय पूर्वाधार तथा अनुदान व्यवस्थापन कार्यालय रसुवामा गई समस्या पहिल्याउन लागे । ट्रान्सपरेन्सी इन्टरनेशनल नेपाल रसुवाको पहलमा जिल्ला आयोजना कार्यान्वयन इकाई (भवन) मा अड्किएको माधव गुरुङको फाइल अघि बढ्यो । र उनले एक हप्ताभित्र नै तेस्रो किस्ता स्वरुपको रकम पाए ।
माधव गुरुङले ट्रान्सपरेन्सी इन्टरनेशनल नेपाल रसुवालाई चिठी लेखी सहजीकरण गरी सहयोग गरिदिनु भएकोमा हार्दिक आभार प्रकट गर्दै भने म त ऋण गरेर ल्याएको पैसाको व्याज बुझाउन पर्ने अवस्थामा पुगिसकेको थिएँ, तपाईहरुको सहयोगले मेरो समस्या समाधान भयो, म धेरै आभारी छु ।transparency International Nepal

ट्रान्सपरेन्सी इन्टरनेशनल नेपाल रसुवाको पहलले समन्वय अभावले अड्किएका कतिपय कामहरु अघि बढाउन सहयोग पुगेको हुँदा व्यवहारिक समस्या हल गर्न सजिलो भएको जिल्ला आयोजना कार्यान्वयन इकाई (भवन)का इन्जिनियरको बुझाई छ । यस्ता पैरवीले परिणाम निकाल्न सहयोग पुग्ने देखिएको छ ।

Comments

comments