१९ वर्षीय युवक आशिस तामाङलाई प्रहरीद्दारा कुटपिट तथा दुर्व्यवहार

police-attrck-Youth

आमाछोदिङमो गाउँपालिका–३ गत्लाङका १९ वर्षीय युवक आशिस तामाङलाई भदौ १७ गते दिउँसो ४ः३० बजे टिमुरे प्रहरी चौकीका प्रहरीले सडकमै कुटपिट तथा दुर्व्यवहार गरेको पीडितले आरोप लगाए ।

ना ६ ख ४९२५ नम्बरको कन्टेनरका चालक च्याङबा तामाङसँग घुम्नका लागि केरुङ जान लागेको बेला गाडीमा रहेका कन्टेनर धनी  युवालाई चौकीका असई डिल्ली चा श्रेष्ठ र प्रहरी हवल्दार रामबहादुर तामाङले टिमुरेमा अपशब्दले गाली गरी कुटपिट गरी दुर्व्यवहार गरेको पीडितका बाबु पेम्पा तामाङले बताए । पीडितलाई प्रहरीले सडकमा लछारपछार गर्दै पालैपालाे कुटपिट गरेकाे भिडियो सामाजिक सञ्जालबाट सार्वजनिक भएको थियो ।

‘रोकेर राखिएको अवस्थाको ना ६ ख ४९२५ नम्बरको कन्टेनरमा यो कस्को गाडी हो भने । किन गलत ठाउँमा पर्किङ गरेको ? भन्दै प्रहरीले सोधे ।’–कक्षा १२ मा अध्ययनरत तामाङले भने–‘मेरो भन्ने बित्तिकै प्रहरीले अपशब्दले गाली गरेर कुटपिट गर्न थाले । मैले थप केही भन्ने अवसर नै मिलेन ।’–उनले भने ।

घटनामा संलग्न प्रहरीलाई गिरफ्तार गरी अनुसन्धान सुरू गरिएको र आवश्यक अध्ययनपछि विभागीय कारबाही हुने जिल्ला प्रहरी कार्यालयका डिएसपी भाग्येन्द्रपुरुष ढकालले बताए ।

भदौ १८ गते भएको छलफलबाट जिल्ला न्यायधिवक्ता बाबुराम भट्टराईको संयोजकत्वमा पाँच सदस्यीय छानविन समिति गठन गरिएको छ ।समितिमा सहायक प्रमुख जिल्ला अधिकारी सपनाकुमारी भट्टराई, प्रहरीका तर्फबाट गोकर्ण थापा, व्यवसायीका तर्फबाट कामीनुर्पू तामाङ र जनप्रतिनिधीका तर्फबाट गाेसाइकुण्ड गाउँपािलका २ का  वडा अध्यक्ष  दावादोर्जे तामाङ रहेका छन् ।

बुधबार बिहान घटनास्थल पुगेको प्रजिअ अर्जुन भण्डारी, प्रहरी नायब उपरीक्षक भाग्येन्द्र पुरुष ढकाल, टिमुरे प्रहरी चौकीका इन्चार्ज तथा राजनीतिक दलका प्रमुख तथा पीडित पक्षका व्यक्तिहरूसँग छलफल भयाे ।  यसैबिच प्रहरीले व्यापारी तथा चालकहरूसँग अवैध रूपमा रकम लिएर रातिराति गाडी छाड्ने गरेको टिमुरेका स्थानीय व्यापारी तथा सिमापार व्यवसायी सङ्घका अध्यक्ष कामीनूर्पु तामाङले आरोप लगाए ।

प्रहरीले स्थानीयलाई दुःख दिएको र ज्यादती गरेको भन्दै रातभर र भदौ १८ गते बिहानसम्म प्रदर्शन गरेका स्थानीयले भदौ १७ गते साँझ नै प्रहरीको चेकजाँच गर्ने ठाउँ भत्काएका थिए । नागरिकमाथि प्रहरीको बर्बरताविरूद्ध प्रदर्शन गरिएको भन्दै अर्कै गाडीका चालक कुमार नगरकोटीले दोषीलाई कारबाही नगरे आन्दोलन नरोकिने चेतावनी दिए ।

प्रमुख जिल्ला अधिकारीलगायतको उपस्थितिमा समस्या समाधानका लागि रसुवा भन्सार कार्यालय टिमुरेमा दिनभर छलफल भएको थियो ।कुटपिटको घटनाको भिडियो सामाजिक सञ्जालमा सार्वजनिक भएपछि भदौ १७ गते बेलुका ९ बजे नै प्रहरीले विज्ञप्ति जारी गरी दोषीमाथि काबवाही गरिने जनाएको थियो । नेकपा र नेपाली कांग्रेस पार्टी प्रतिनिधि, जनप्रतिनिध, व्यवसायी र सुरक्षा निकायको बैठकबाट सुरक्षा संवेदनशीलतालाई ध्यान दिइ रसुवागढी, टिमुरे क्षेत्रमा रातको समयमा ११ बजेसम्म मात्र बजार खुल्ला गर्ने, चेक जाँच मर्यादित बनाउने र चेकजाँच बिन्दु पुनरावलोकन गर्ने, पार्किङ तथा स्थानीय समस्या समाधान गर्न गोसाइकुण्ड गाउँपालिका वडा नं.२ का अध्यक्षको नेतृत्वमा ६ सदस्यीय समिति गठन गरिएको छ ।

त्यसैगरी प्रत्येक महिना समितिमा छलफल गरी आइपरेका समस्या समाधानका लागि पहल गर्नेलगायत आठ बुँदे सहमति भएको जनाइएको छ । जिल्लावासीलाई सिधै केरुङसम्म जान एकदिने पास र साना सवारी साधन लिएर सिधै केरुङसम्म जानका लागि प्रशासनले आवश्यक पहल लिने, प्रवेश पास नविकरण तथा वितरण व्यवस्थित र गलत तरिकाले पास लिने प्रवृत्ति निरुत्सहित गर्ने, रसुवागढी सिमा सुरक्षा व्यवस्था, बजार, पार्किङ व्यवस्थापन गर्ने र तस्करी नियन्त्रण गर्न स्थानीयको समेत सहयोग लिने गरी १७ गते टिमुरेमा भएको घटनापछिको आन्दोलन स्थगन गर्ने समेत निर्णय भएको हो ।

केरुङबाट काठमाडौं जाने क्रममा रोकिराखेको कन्टेनरमा तामाङ आराम गरिरहेका थिए। प्रहरीले गाडी हटाउनका लागि आग्रह गर्दै अपशब्द बोलेपछि तामाङसँग केही बेर भनाभन भएको थियो। दुई जना प्रहरीले सडकमा कुटेको भिडियो सामाजिक सञ्जालमा फैलिएकाे थियाे ।

Comments

comments